Азнакай кырларында көзге культуралар кышка ничек керә?

Көзен дә яңгырлар кырларны куандырмады. Туфракта дымлылык 120 процент булырга тиеш, ә ул районда нибары 51 процент тәшкил итә.

“Нәтиҗәдә уҗымнар соң тишелде, һава темпратурасының түбәнәюе вегетация активлыгын киметте, алар куакланмады”, – ди Россельхозцентрның Азнакай районы бүлеге җитәкчесе Маргарита Хәсәншина.

Район кырларында уҗым культураларының 5600 гектары – яхшы, 300 гектарга якыны – начар тишелешле, калганы – канәгатьләнерлек.

Татарстан буенча көзге культуралар 481,1 мең гектарда чәчелгән. Аларның 272,2 мең гектары – яхшы, 151,5 мең гектары – канәгатьләнерлек, 16,5 мең гектары – начар торышта.