- Безнең республика энергия чыганакларына сакчыллык мәсьәләсендә Идел буе федераль округындагы төбәкләр арасында үрнәк булып тора, - диде республиканың сәнәгать һәм сәүдә министры урынбасары Алексей Сергеев кичә матбугат конференциясендә.
Татарстанда энергетика тармагын заманча камил технологияләр белән җиһазландыру нәтиҗәсендә, электр энергиясе җитештерүгә тотылучы ягулык күләмен 2,4 процентка киметүгә ирешелгән.
Республика икътисадында энергиягә сакчыллык чаралары, 2007 ел белән чагыштырганда, чыгымнарны 23,3 процентка киметергә ярдәм иткән. Моны экономияләнгән 7,8 миллион тонна яки 123 мең цистерна мазут сыйфатында күзалларга булыр иде.
- Фестивальнең максаты - халыкта энергия чыганакларына сакчыл карашны пропагандалау, - диде Алексей Сергеев.
Теләге булган һәр кеше Интернет челтәрендә фестивальнең www.вместеярче.рф сайтында акциягә теләктәшлек белдерә ала.
- Казан да фестивальгә кушылды. Мәктәпләрдә энергиягә сакчыллык буенча тәүге дәресләр һәм рәсем конкурслары үткәрелде инде, - диде шәһәр башкарма комитетының икътисади үсеш комитеты рәисе Илдар Шакиров.
"Казан" гаилә үзәге каршындагы мәйданда 10 сентябрьдә 12.30 сәгатьтә "Бергә Яктырак" фестивале кысаларында мәдәни чара үткәрелә. Татарстанның энергетика предприятиеләренең күргәзмәләрен карарга мөмкин булачак. Балалар арасында рәсем конкурслары оештырыла. Җәйге сәхнәдә сәнгать осталары чыгыш ясаячак.
Фото: misanec.ru
Нет комментариев