21 февраль – Халыкара туган тел көне

Бакчада – бәйрәм

Халыкара туган тел көне уңаеннан Балалар китапханәсе 6 нчы “Йолдызкай” балалар бакчасында тәрбияләнүче балалар өчен “Тел – халык җаны” темасына танып-белү сәгате оештырды. Чара барышында китапханәче Гөлнара Курбаева бәйрәмнең тарихы, планетада телләрнең күптөрлелеге һәм туган телнең әһәмияте турында мәгълүмат белән уртаклашты. Очрашуга талантлы шагыйрә  һәм журналист Нәсимә Фазлыева чакырылган иде.

Балалар аның тормышы һәм иҗаты, шулай ук  күптән түгел басылып чыккан “Кояшлы өй” китабы белән таныштылар. Балалар шагыйрәнең шигырьләрен  сәнгатьле итеп яттан сөйләделәр һәм “Рәхмәт әйтте кызылтүш” шигыре буенча үз куллары белән ясалган картинаны бүләк иттеләр. Очрашу ахырында Нәсимә апалары нәни дусларына китапларын бүләк итеп сөендерде. Кызыксынучан балалар сораулар бирергә дә онытмадылар. .Мәсәлән,”Сез шигырьләрне нигә язасыз?” дигән сорауга Нәсимә Фазлыева:

Нәни дусларымны бик тә яратам. Шигырьләремне дә балалар укысыннар, тәртипле, акыллы, тәүфыйклы булып үссеннәр, туган иллләрен, туган телләрен, әти-әниләрен яратсыннардип язам, дип җавап бирде.

Балалар бакчасыннан өлкән тәрбияче Нәфисә Фәтхуллина, мәктәпкә әзерлек төркеме тәрбиячесе Дилүсә Харрасова, Балалар  китапханәсе китапханәчеләре Гөлнара Курбаева һәм Ольга  Хәлиуллина әнә шулай бергәләп нәниләр өчен онытылмаслык, матур кичә оештырдылар.