Азнакайда терлек азыгы әзерләү техникасының әзерлеген тикшерделәр

 Тикшерүне ТР Авыл хуҗалыгы һәм азык-төлек министрлыгының хезмәт куркынычсызлыгы секторы әйдәр белгече Вячеслав Трушев җитәкләде.

Комиссия составында район авыл хуҗалыгы һәм азык-төлек идарәсе җитәкчесе Рамиль Исламов, «Россельхозцентр»ның район бүлеге җитәкчесе Маргарита Хәсәншина һәм хуҗалык җитәкчеләре дә эшләде.

Тикшерү «Союз-Агро» җәмгыятеннән – Бирючевка авылыннан башланды. Биредә азык әзерләүдә катнашачак техникалар тулысынча ремонтланган, аларны тәҗрибәле механизаторлар хезмәтләндерә.

Комиссия шулай ук «Л. Закирова» һәм «Таллы Бүләк» хуҗалыкларында булды.

«Таллы Бүләк»тә комбайннарының эшен урыннарында ук сынап карадылар. Тикшерү нәтиҗәләре буенча техниканың эш сыйфатына карата дәгъвалар булмады.

– Хуҗалыкларда техникалар әзерлек сызыгында тора. Әмма безнең өчен техника торышы гына түгел, хезмәт куркынычсызлыгы мәсьәләләре дә мөһим. Эшчеләрне махсус кием белән тәэмин итү, инструктажлар үткәрү, хезмәтне саклау таләпләрен үтәү – болар барысы да игътибар үзәгендә булырга тиеш. Азнакай районында бу юнәлештә эш тиешле дәрәҗәдә оештырылган, – дип билгеләп үтте Вячеслав Трушев.

Комиссия шулай ук хуҗалыкларның эш планнары белән танышты, терлек азыгы әзерләү барышы һәм хезмәт хакы түләү мәсьәләләре белән кызыксынды.

Бу хакта тулырак – “Маяк” газетасында