Азнакай авылларында татар йортларының серләрен өйрәнделәр

Экспедициянең беренче көнендә галимә туган якны өйрәнү музеенда эшләде. Аннан соң Урсай, Мөслим һәм Чалпы авылларында йортларның архитектура үзенчәлекләре белән танышты, агач остасы, тәрәзә йөзлекләре, сандыклар, сәгатьләр ясаучы Илдар Гадиев остаханәсендә булып, уеп ясалган агач эшләнмәләрен карады.

Экспедициянең икенче көне Мәлбагыш, Әлкәй һәм Сарлы авылларында дәвам итте. Рауза Солтанова татар йортларының төзелеш алымнарын, капка-койма, тәрәзә йөзлекләре һәм агач бизәкләренең сакланышын өйрәнде. Әлкәй авыл мәдәният йортындагы музей коллекциясе белән дә танышты.

«Авыл йортлары – ул гади корылма гына түгел, ә милләтнең узганы, бүгенгесен ачып бирә торган хәтер сандыгы. Аның төзелеше, бизәге, хәтта капкасының нинди булуы да кешеләрнең дөньяга карашын, зәвыгын,осталыгын, тормыш рәвешен күрсәтә. Бүген инде авыллар да заман сулышы белән яши. Шулай да милли төзелеш традицияләрен саклап калган йортларның күп булуы сөендерә. Бу – халкыбызның тарихи мирасына хөрмәт билгесе», – диде Рауза Солтанова, үзенең хис-кичерешләре белән уртаклашып.