Тымытык авылында милли бәйрәмебез - Сабан туе гөрләп үтте

Авыл халкын, бәйрәм кунакларын район башкарма комитеты җитәкчесе Айдар Шәмсетдинов, җирлек башлыгы Эльвира Гыйләҗева тәбрикләп, иң изге теләкләрен җиткерделәр.

Соңыннан иҗтимагый тормышта, егетләребезгә гуманитар ярдәм туплауда актив катнашкан апа-абыйларга, юбилярларга бүләкләр, Рәхмәт хатлары тапшырылды. Мәйдан түрендә шулай ук авыл хуҗалыгы тармагында лаеклы хезмәт куйган уңганнарны да данладылар.

Бәйрәм милли уеннарга бай булды. Тымытыклылар таяк тартуда, авыш баганага менүдә, сулы чиләк белән йөгерүдә, кул көрәшендә, капчык сугышында, кәлүш киеп йөгерүдә теләп катнаштылар. Таяк тартуда җиңү яулаучыга да бүләкнең шәбен әзерләгәннәр. Иганәчеләр тарафыннан бирелгән "бетономешалка"га Күктәкә авылы егете Рәлиф Морзакаев лаек булды.

Махсус кунаклар - Башкортстан Республикасының атказанган артистлары Алмаз һәм Айдар Юнысовлар һәм автор-башкаручы Ринат Рәхмәтуллиннарның чыгышлары һәркемгә күтәренке кәеф бүләк итте.