Мәсгут авылында солдат әниләрен хөрмәтләделәр

Туган җиребез шифалы суы белән сусавыбызны баса, нигъмәтләре белән туендыра алса да, ул үз-үзен саклый, яклый алмый. Менә шул вакытта илебезнең батыр уллары кулларына корал алырга мәҗбүр була. Тарих күрсәткәнчә, һәр чорда халкыбызның үз каһарманнары булган һәм сугышчан батырлык – кешелек сыйфатлары арасында иң югары урыннарның берсен били.

Бүгенге көндә дә бу хакыйкать аеруча ачык күренә. Махсус хәрби операция башлангач, безнең авыл егетләре дә ил сагына басты. Һәрбер көчле ир-егет артында тагын да көчлерәк кешеләр – аларны бөтен йөрәкләре белән яраткан аналар бар. Аларның сабырлыгы, түземлеге – аерым хөрмәткә лаек.

Мәсгут авылы китапханәсендә махсус хәрби операциядә катнашучыларның әниләренә багышланган очрашу узды. «Дөнья, сиңа дәшәм – мин солдат әнисе!» дип исемләнгән чарада аналарга рәхмәт һәм ихтирам белдерелде. Кичәдә патриотик шигырьләр, татар халык җырлары яңгырады. Девяткина Нурания апа һәлак булган улына багышлап язган шигырен укыды – бу чыгыш беркемне дә битараф калдырмады.

Очрашу ахырында әниләргә чәчәк бәйләмнәре тапшырылды, аралашу чәй табыны артында дәвам итте.

«Авылдашларыбыз – илгә батыр уллар үстергән олы йөрәкле апаларга ныклык, сабырлык һәм саулык-сәламәтлек теләп калабыз. Сезнең улларыгыз белән без барыбыз да горурланабыз», – ди авыл китапханәчесе Ләйлә Хуҗина.