“Кырмыска оясы”

Камыр өчен:

1 кап маргаринны эретәм
2 йомырка
1 стаканшикәр комы
ярты пачка камыр көпшәкләндергеч (мин ике порциягә берне салам). Барысын бергә яхшылап болгатам.
Он салып камыр басам. Кем ничек пешерә ала камырны, элек табага угычтан уа идем, хәзер ялкаулык көчәйде, эшне тизләттем, табага камырны юкарак итеп җәеп салам да пешереп алам, кайнар килеш уалыйм, җитешмәгән очракта комбайнның эресеннән үткәрәм. Менә бу юлы комбайннан үткәрдем.
Крем өчен:
1 банка куертылган сөт
3 аш калагы бал
3 аш калагы ак май
Барсын бергә җылытып алам да,камыр өстенә салам, яхшылап болгатам, савытларга салып өям.

Ашларыгыз тәмле булсын!