Тизлек. Вакыт. Юл...

Статистика мәгълүмат-ларына караганда, юллардагы фаҗигаләр нәтиҗәсендә дөньяда ел саен 1 миллион 300 мең кешенең гомере өзелә. Бу - көн саен 3 меңнән артык кеше дигән сүз. Корбаннарның күбесе - 15 - 44 яшьлек кешеләр. Агымдагы елның ике аенда Россия юлларында 320 фаҗигасендә 47 кеше вафат булган, шулар арасында дүрт бала да бар...

Әйе, юллар кешеләрне очраштыручы да, бер-берсеннән ерагайтучы да. Әмма ялгышларны гына гафу итми, берәүне дә аямый.

6 март көнне шәһәрдә дә коточкыч юл-транспорт һәлакәте булды. Шәйхетдинов-Муса Җәлил урамы буенча хәрәкәт итүче "Honda Ascot Innova" автомобиле шоферы, кызу тизлектә килү сәбәпле, идарәне югалта һәм урам баганасына килеп бәрелә. Авыр тән җәрәхәтләре алган ир-ат район үзәк сырхауханәсендә һәлак була.

Күпчелегебезнең һәр көне юллар белән бәйле. Сак булыйк, "Сакланганны Алла саклар" дигән әйтемне истә тотыйк. Якыннарны югалту ачысын бер генә үлчәүгә дә салып үлчәп булмый...