Азнакайда салкын тиеп чирләүчеләр арта

Шушы соңгы атна эчендә генә дә илнең 59 шәһәрендә грипп һәм салкын тиеп чирләү очраклары 51,7 процентка арткан. Чир олысын да, кечесен дә бертөсле аяктан ега. Татарстанда да хәлләр начарлана бара: авырулар эпидемия чигеннән 11,4 процентка артып киткән. Уку йортлары, балалар бакчаларына чикләүләр кертелә. Ә инде гриппнең үзенә килгәндә, ел башыннан республикада 63 шундый очрак теркәлде. "Азнакай районында ОРВИ авырулары очраклары 11 гыйнвардан теркәлә башлап, ай дәвамында 121гә җитте, - ди Роспотребнадзор идарәсенең баш белгече-эксперт Линера Габделхакова. - Февральнең шушы 3 көнендә генә дә 83 кешенең салкын тидереп авыруы теркәлде. Мәктәпләрдә дә укучыларның күпләп чирле башлавы күзәтелә."

Белгечләр авыру кешегә тышка чыгып йөрмәскә, табибларга мөрәҗәгать итәргә киңәш итә.