Азнакайда гитарачылар фестивале узды

Балалар иҗат үзәгендә "Җырла, гитара" берләшмәсе тарафыннан оештырылган гитарачыларның VII җыр фестивале узды. Анда берләшмә әгъзалары һәм музыкага битараф булмаган 40 ка якын кеше чыгыш ясады.

- Уку елы башыннан ук без репертуар әзерлибез. Ул җырлар белән төрле бәйгеләрдә призлы урыннар яулыйбыз, - ди "Җырла, гитара" берләшмәсе җиткәчесе, өстәмә белем бирү педагогы Регина Стрих.

Берләшмәдә 4-11 сыныйфларда укучы иллегә якын бала шөгыльләнә. Аларның күбесе район, республика, федераль һәм халыкара конкурсларда актив катнаша.

- Һәр чыгыш алдыннан дулкынландыра. Ә сәхнәгә аяк басып, тамашачылар йөзен, алар елмаюын күргәч, каушау юкка чыга һәм син бар җаның-тәнең белән музыка дөньясына чумасың, - ди Лиана Сәгыйтова.

Фестиваль өч сәгатьләп барды. Зал гитара кылларының сихри симфониясенә күмелеп, күңелләргә дәртле моң булып ятты.

Зульфия ХАМИТОВА, яшь хәбәрче