Азнакай укучылары һөнәр сайлый

Бүгенге көндә һөнәр бирүче уку йортларының исәбе юк. Әмма кайда нинди белгечлек үзләштереп булуы турында без еш кына хәбәрдар түгел. Профориентация максатларында ел саен мәшгульлек үзәге өлкән сыйныф укучылары өчен Казан, республикабызның көньяк-көнчыгышындагы урта һәм югары уку йортлары вәкилләре катнашында "Мәгариф, карьера" дигән уку урыннары ярминәкәсе оештыра. 18 февральдә Мәдәният йортында узган бу ярминкәдә һәр укучы үзен кызыксындырган сорауларга тулы җавап тапты, һөнәргә тәңгәл килүен тикшереп, тестлар үтеп карады. Муниципаль район башлыгы Марсель Шәйдуллин мондый ярминкәләрнең әһәмиятен ассызыклап, районга кирәкле һөнәр ияләре хакында чыгыш ясады, укучыларны диплом алгач, туган якларына кайтырга чакырды.