Азнакай укучылары Бөек Болгарга сәяхәт кылды

Азнакай 1 нче урта мәктәбенең 7-9 сыйныф укучылары, Россия укучылар хәрәкәте активистлары укытучылар һәм әти-әнилр белән берлектә Бөек Болгарга сәяхәт кылды.

Балалар Болгар иленең тарихы, халкының тормыш-көнкүреше белән танышты, таш пулатлардан, мавзолей һәм манарадан калган харәбәләрне үз күзләре белән күрделәр, Болгар ханы турындагы борынгы риваятьләрне бик кызыксынып тыңладылар.

Икмәк музеенда, тегермәндә булдылар. Дөньядагы иң зур Коръән дә аларда соклану хисе уытты. Балаларның биредә йөреп, көзге табигать матурлыгы белән хозурланырга да вакытлары калды. Үзләре белән алар төрле истәлекле бүләкләр алып кайтты.

Мондый сәяхәтләр балаларның дөньяны күзаллавын арртырып кына калмый, үз иле өчен горурлык хисе дә уята, дигән нәтиҗә ясады әти-әниләр.