Сарман районында көчле яңгыр аркасында юл ишелде

Яңгыр сулары юл астындагы корылмаларны зарарлаган, нәтиҗәдә грунт утырып, юл полотносы җимерелгән. Куркынычсызлык максатларыннан чыгып, әлеге урында автомобильләр өчен хәрәкәт тулысынча туктатылды. Вәзгыятьне контрольгә алу өчен, проблеманы төзәтү эшенә республика дәрәҗәсендәге хезмәтләр дә җәлеп ителде.

Сарман районы башлыгы Фәрит Хөснуллин бу нисбәттән йөртүчеләргә мөрәҗәгать белән чыкты:

«Юл хәрәкәтендә катнашучыларның барысыннан да вакыйганы исәпкә алып, Петровск заводы һәм Ләке авыл җирлекләре аша салынган әйләнеч юлдан файдалануларын сорыйм. Хәзерге вакытта урында барлык җаваплы оешма вәкилләре катнашында ашыгыч киңәшмә бара. Белгечләр зыян күләмен тикшерә һәм хәрәкәтне торгызу өчен тиешле чаралар күрә. Автомобилистлардан тынычлык саклауларын, юл хезмәтләренең күрсәтмәләрен төгәл үтәүләрен һәм бары тик рәсми мәгълүматка гына игътибар итүләрен үтенәм»,

— диелә аның социаль челтәрдәге битендә.

Исегезгә төшерәбез, узган төндә төбәктә 108 мм явым-төшем теркәлгән, бу июль аеның тулы нормасына тиң. Транспорт агымын рөхсәт ителгән маршруттан читкә җибәрмәү өчен, юл хезмәткәрләре постларда кизү тора.

Язма чыганагы: Татар информ