Бөек Җиңү уңаеннан музейда укучы балалар һәм балалар бакчаларында тәрбияләнүчеләр районыбызның хөрмәтле ветеран апалары - сугыш чоры балалары белән очрашты.
"Сугыш башлангач авылларда картлар, хатын-кызлар һәм балалар гына кала.Ә бит тормышны алып барырга кирәк була, игенне дә игәргә, балаларны да ач-ялангач итмәскә, фронтка да төрле җылы киемнәр әзерләп, азык-төлек җибәрергә. Шундый олы йөрәкле, сабыр, фидакарь хезмәт ияләре бүген дә безнең арабызда яши," - дип, кичәне башлады музей экскурсоводы Гөлфия Мостафина. - "Бүгенге кунакларыбызның да балачагы сугыш елларына туры килгән, алар безнең якташларыбыз, тыл ветераннары - Наҗия ханым Насыйрова, Дилбәр ханым Хаҗиева. Аларны чакыруыбыз юкка түгел, алар сугыш чорында бала булсалар да тырышып, фронт өчен көч куйганнар: колхоз басуында башак җыюлар, молотилка белән ашлык сугулар, урман кискәндә агач ташулар - болар барысы да якташларыбызның җилкәсендә булган."
Очрашу кунаклары сугыш вакытындагы авырлыкларны күз яшьләре белән искә алдылар, әтиләре, бабаларының сугышта күрсәткән батырлыклары турында балаларга сөйләп, гаилә альбомыннан фотолар да күрсәттеләр, ә балалар аларны бик игътибар белән гаҗәпсенеп тыңладылар.
Соңыннан "Бөек Ватан сугышы һәм сугыштан соңгы еллар" дигән темага багышланган экскурсия оештырылды.
.
Подпишитесь на Telegram- канал газеты «Маяк», а так же читайте нас в «Дзен» и всегда оставайтесь в курсе новостей района!
Нет комментариев