Әлешме, бәлешме? Кайсысы тәмлерәк һәм җайлырак?

Безнең яклар бит бәлешкә күнеккән. Ә ул озак пешә. Әлеш исә ярты сәгатьтә әзер була. Шул ук бәлеш инде ул, әмма кечкенә варианты һәм тавык ите белән.

Кыскасы, нәкъ бәлешкә кебек бәрәңге, тавык итенең йомшагын, суганны шакмаклап турыйбыз. Тоз, борыч сибәбез. Тавык итенең тиресен турамадым, тәмлерәк булсын дип, эчлеккә бераз ак май эретеп салдым.

Камырына маргарин (80-100 г), калган 1-2 калак каймагым бар иде - аны, 1 стакан кефир (каймаклы булгач, мин су гына салдым), камыр йомшарткыч (разрыхлитель), бер чеметем тоз, шикәр комы, он салып, өчпочмак һәм бәлешнеке кебек камыр ясыйбыз. Мин йомырка салмадым.

Әбиләр дә тәмләп ашый торган йомшак камырлы, эче сусыл әлеш килеп чыкты.

Ашларыгыз тәмле булсын!