Азнакайның асыл затлары республика күләмендә танылды

Иң-иңнәр дип табылган гүзәл затлар һәм үрнәк ир-егетләребез үзләрен башта район күләмендә, аннан Лениногорск шәһәрендә узган зона бәйгесендә тәкъдим итеп, барысы да җиңү яуладылар.

Бәйге финалына узган азнакайлылар 8 Март бәйрәме алдыннан “Корстон” күңел ачу үзәгендә җиңүчеләрне бүләкләү тантанасында катнаштылар. Өч райондашыбыз үз номинацияләрендә республика күләмендә җиңү яулап, зур хөрмәткә ия булдылар.

Якташыбыз – «ТНВ» телеканалында чыга торган «Халкым минем» тапшыруының авторы һәм алып баручысы Ләйсәнә Садретдинова – “Хатын-кыз – мәдәният һәм рухият”,  махсус хәрби операция зонасына даими рәвештә гуманитар илтүче, егетләргә җибәрү өчен үз хисабына 500 тонна агач материалы әзерләгән Рафаэль Габделхаков – “Ир-ат – мәрхәмәтле йөрәк”; Актүбә бистәсендә гомер итүче сигез бала анасы Алина Гатина “Хатын-кыз – ана" номинациясендә җиңү яуладылар.

Аларны ихлас күңелдән котлыйбыз!