Исерек шофер – юл бәласе

27 февральдән 24 мартка кадәрге чорда гына да Азнакайның җәмәгать суды участокларында исерек шоферлар белән бәйле дистәдән артык эш каралган. Эчкән килеш руль артына утырган Р.Гомәров, Р.Ганиев, Ф.Имамов, А.Мартемьянов, Ф.Дәүләтшин, Р.Җиһангиров, А.Сафиуллин, Н.Кашапов, С.Мирзафатыйхов, А.Гарипов, М.Әгълиуллин юл иминлеге сакчылары тарафыннан туктатылган. Кайберсе медицина тикшерүе үтүдән баш тартып, гаебен тагын да авырлаткан.

Җәмәгать суды утырышларында аларның юл иминлеге таләпләрен бозулары фактлар белән дәлилләнеп, тиешле карар чыгарылган. Карар катгый: 30 мең сум штраф һәм машина йөртү хокукыннан ел ярымга мәхрүм итү. Мондый очраклар тагын да кабатланганда, машинасыз калу ихтималы булуы турында да онытмаска кирәк.