Азнакайлылар игътибарына: июль аена сынамышлар

16 июльдә озынборын һәм черкиләр түгәрәкләнеп очса, алдагы 7 көн коры һәм матур булыр.

17 июльдә болытлар бер буй булып сузылып ятса - җылы көннәргә.

18 июль киче көндезгә караганда җылырак булса - яңгырга.

19 июль дымлы булса, сентябрь дә юеш булыр.

20 июль көнне яңгыр бер-ике сәгатьләп яуса - иген өчен зыянлы.

21 июль төнлә Ай тоныкланса, июль ахыры яңгырлы булыр.

22 июль кара җиләк уңса - суык кышка.

23 июль - әгәр каен яфраклары агачның очыннан саргая башлый икән - иртә көзгә. Астан өскә таба саргая башласа, көз озак килер.
24 июль - яңгыравыклы күк күкрәү - тыныч яңгырга, гөрелдәвеклесе - коеп яуган яңгырга.
25 июль иртәсендә көчле чык һәм томан күзәтелә икән, җәйнең калган өлеше коры һәм эссе булыр.
26 июль кичендә черкиләр котыра икән - гөмбә уңышына.
27 июльдә яңгыр яуса, тагын 7 көн явачак.
28 июль - иртәдән коеп яңгыр яуса, эссе көнгә. Кичен томан төшсә, иртән яңгыр явар.
29 июль яңгырлы икән, алдагы ике-өч көн дә юеш булыр. Тилгәннәр очып уйнаса, эссе көннәргә ишарә.
30 июль - көз июльнең соңгы һәм августның беренче көне кебек булыр. Бу көнне яшен булса, көз яңгырлы, кыш буранлы килер.
31 июльдә көн эссе булса, декабрь суык булыр.

– Җәй уртасы – Питраудан соң үсемлекләр үсүдән туктый. «Питрау җитте – җәй үтте» дигән гыйбарә дә бар. Бу көнне яңгыр яуса, иген уңмый дип саныйлар. 
 
– Егерме бишендә кырау булса, кыш суык килә. 
 
– Июльнең соңгы көнендә көн эссе булса, декабрь суык килер.