Азнакайлылар Татарстан Дәүләт Советына депутатлар сайлый (ФОТО)

Безнең район территориясендә – 42, шәһәрдә 20 участок сайлау комиссиясе оештырылган. Җирлегебездә тавыш бирү хокукы булган 49241 гражданин исәпләнә.

Шәһәрнең тугыз сайлау участогында исә бүген электрон тавыш бирү кулланыла.

Бөтен район буенча сайлау участоклары иртәнге 7 сәгатьтә ачылды. Без исә елның төп сәяси вакыйгасын “яктыртуыбызны” шәһәрнең 8 нче мәктәп бинасында урнашкан 517 нче сайлау участогыннан башладык. Биредә Хәсәнов, Солтангалиев урамнарында урнашкан 10 күпфатирлы йортта яшәүче 1296 кеше тавыш бирә.

– Безнең участокта иртәнге сәгатьләрдән үк зур активлык күзәтелә. Димәк, азнакайлылар республиканың, районның киләчәге өчен битараф түгел, – ди сайлау участогы рәисе Фәнис Ахунҗанов.

Биредә өлкәннәр аеруча актив. Һәркемнең күңеле күтәренке.

– Илләребез тыныч, табыннарыбыз сый-нигъмәттән сыгылып тора, шөкер. Шуңа сайлауларга һәрчак сөенеп барам, сайлаган депутатларыбыз өметләребезне акласын иде, – ди Рәсимә апа Галиева.