Азнакайда яшәүче Нурия Идиятуллинадан яшелчә икрасы рецепты

Тирәбездә уңган-булган кешеләр күплегенә көннән-көн ныграк инанабыз. Азнакайда яшәүче Нурия Идиятуллина редакциябезгә «гаҗәеп» помидорын күтәреп килгәч, аның тырыш бакчачы гына түгел, аш-суга да, кул эшләренә дә оста икәнен белдек. Үзендә нинди сәләт яшеренеп ятканын кайчак кеше ничә еллар сизми яши. Нурия ханым да бәйләм серләренә лаеклы ялга чыккач кына, Чалпы тернәкләндерү үзәгендә хезмәт терапиясе занятиеләрендә төшенгән. Үзенең бәйләм әйберләре белән район конкурсларында катнаша. Нурия Идиятуллина озак еллар «Сельхозтехника» җәмгыятендә бухгалтер, диспетчер булып эшләгән.

«Маяк» укучыларына аның яратып ясый торган яшелчә икрасы рецептын тәкъдим итәбез:

2 кг помидор, 2 кг кишер, 1 кг суганны иттаркыч аша чыгарып, 2-3 тармак сарымсакны кыргычтан кырып, ярты литр май, 2 аш калагы тоз салып, 2,5 сәгать кайнатасың да стерильләштерелгән банкаларга тутырып, тимер капкач белән ябасың. Каплатып суытасың. Икра шуның белән үзенчәлекле, аңа уксус салынмый.