Татарстанда янгын өч гаиләне йорт-җирсез калдырган - фото

Бер йортта тугыз кеше яши торган булган.

Яшел Үзән районында шәхси йортта янгын чыккан, дип хәбәр итә Россия Гадәттән тыш хәлләр министрлыгының Татарстан буенча Баш идарәсе матбугат хезмәте.

Янгын бүген иртән Октябрьский бистәсендәге Транспорт урамында чыккан. Янгын сүндерүчеләр килеп җиткән вакытта йорт ачык ут белән янган. Янгынның гомум мәйданы 114 квадрат метр тәшкил иткән. Янгын аркасында берәү дә зыян күрмәгән.

Йортта өч гаилә яши торган булган. Бинаның бер өлешендә биш кеше, икенчесендә - бер, өченчесендә өч кеше гомер кичергән. Янгын аркасында алар йорт-җирсез калган. Әлегә алар күршеләренә урнашкан.

Башлангыч версия буенча, ут электр җиһазларын монтажлау кагыйдәләрен бозу аркасында чыккан, дип яза Татар-Информ.