Сукаешлылар тагын беренчелекне бирмәде

Мәдәният елы уңаеннан районда уздырылган "Иң яхшы авыл мәдәният йорты хезмәткәре" дигән конкурска шушы көннәрдә йомгак ясалды.

- Әлеге чара яңа талантларны ачарга ярдәм итте, клуб практикасында заманча технологияләр куллануның чәчәк атуын да күрсәтте, - ди мәдәният идарәсе җитәкчесе Гөлсинә Хафизова.

Конкурста барлыгы 36 мәдәният йорты һәм клубтан директорлар, сәнгать җитәкчеләре катнашкан. Ул ике турда узган. Беренче турда мәдәният хезмәткәрләре режисерлык осталыкларын һәм җырга-биюгә сәләтләрен күрсәткәннәр. Йомгаклау турына 7 финалист: Татшуган, Сәпәй, Әсәй, Сукаеш, Урманай, Митрәй, Благодатный авыллары мәдәният йортлары чыккан.

Бу бәйгедә дә Сукаешлылар сынатмаган - районның "Иң яхшы авыл мәдәният йорты хезмәткәре" дигән исемгә Әлфия Сабитова лаек булган. Икенче урында - Благодатныйдан Галия Бахтиозина, өченче урында - Татшуганнан Асия Мөхәммәтгарипова.

- Катнашучыларның барысы да бәйгегә бик җитди караган, борынгы гореф-гадәтләр темасын кузгатып, кызыклы номерлар әзерләгән. Шулай ук заманча жанрлар темасын да яхшы ачтылар, - дип жюри әгъзасы, "Ак калфак" татар хатын-кызлары җәмгыятенең Азнакай бүлеге җитәкчесе Эльвира Галиева үз тәэсирләре белән уртаклашты.