Сабыең турында онытма!

Гаиләдә савыт-саба да шалтырамый тормый шул. Кайбер очракларда үзара туган бәхәс аерылышуга кадәр алып барып җитә. Менә шул вакытта кайбер ата белән ананы алыштырып куялар диярсең: алар балалары турында кайгырту хакында гел оныталар. Әйтерсең, бала аныкы түгел. Шуннан алимент буенча тау кадәр бурычлар җыела, эш судка барып җитә.

Шундый түләмәүчеләр белән көрәшү максатыннан, 14-16 октябрь көннәрендә Азнакай суд приставлары хезмәте вәкилләре «Балаңны онытма – алиментыңны түлә» акциясе үткәрде.

Рейд барышында акча түләүдән качып йөрүчеләрнең берничәсе чит илгә чыгу хокукыннан да мәхрүм ителгән. Әҗәтлеләр арасында транспорт йөртү хокуклары чикләнгәннәр дә бар.

– Алиментлар түләтү мәсьәләсе районыбызда һәрвакыт җитди контрольдә. Бу юнәлештә даими эш алып барабыз. Алга таба мондый рейдлар тагын уздырылачак,– диде суд приставлары федераль хезмәтенең Азнакай районы бүлеге җитәкчесе Рудольф Хәбибуллин.

Фото https://pixabay.com