Кулыннан килмәгән эш юк

Әсәй авылы җирләрендә хуҗалык итүче "Шәвәлиев" КФХсы печән әзерләү буенча район агросәнәгать предприятиеләре арасында алдынгыларның берсе булып тора.
Наил Абдуллин
Биредә аны тәүлеклек технология буенча башкаралар - күпьеллык үләнне иртә таңнан, үсемлектәге витамин аның тамыр өлешенә күчкәнче чабалар, көн кызуында теземнәрне берничә тапкыр әйләндереп киптерәләр һәм кичке якта җыеп та алалар. Шушы юл белән терлекләр өчен кышка югары сыйфатлы ризык базасы булдыруга ирешәләр.
Кипкән печәнне "МТЗ-80" тракторына тагылган пресслау агрегатында төргәкләүне КФХ механизаторы Равил Әмиршин башкара.
Равил - бөтен гомерен туган авылына багышлаган ир асылы, җир улы. Армия сафларында хезмәт итеп кайтканнан соң автомашинада эшләгән булса, шактый еллар инде тракторда җир эшкәртә, иген чәчә. Кышларын хуҗалык малларына азык кертә. Кыскасы, ел әйләнәсендә эшсез торганы юк. Җитәкчеләре Зиннур Шәвәлиев аның турында җылы сүзләр генә әйтә.