Һөнәр сайлау: үзеңнең сәләтләреңне ничек ачыкларга?

Киләчәк профессиягә табигый рәвештә үз сәләтеңне, кызыксынуыңны һәм көчле якларыңны исәпкә алып килү кирәк. Шулай гына эш күңелгә хуш килер, ә нәтиҗәләр дә яхшы булыр.

Сәләтне ачыклау өчен берничә ысул бар.

Беренчедән, үзеңә нәрсә ошый икәнлеген аңларга кирәк: кайсы фәннәр җиңелрәк бирелә, нинди эшләр башкарганда вакыт үтүен дә сизмисең? Мәсәлән, бала чактан ук кешеләр белән эшләргә ошаса - социаль һөнәрләр (укытучылык, медицина) туры килергә мөмкин; саннар, графиклар, системалар ошаса -техника, икътисад, IT тармаклары туры килер.

Икенчедән, практика кирәк. Үзеңне сынап  эшләп карау - бик файдалы. Мәктәптәге профориентация чаралары, лагерьлардагы профиль сменалары, предприятиеләргә экскурсияләр аша үзеңне сынап карарга мөмкин. Кайбер уку йортларында «ачык ишек» көннәре үткәрелә - анда уку процессын күреп, педагоглар белән аралашып, тагын да төгәлрәк фикергә килергә була.

Өченчедән, тестлар һәм консультацияләр ярдәм итә ала. Психолог һәм профориентатор белән сөйләшү, кызыксындыру һәм тестлар үтү үзеңдә нинди сыйфатлар көчле икәнен ачыкларга ярдәм итә. Ләкин тест нәтиҗәсе - киңәш, тик карар үзеңнеке булырга тиеш.

Дүртенчедән, гаилә һәм укытучыларның киңәше дә мөһим. Алар сине күбрәк беләләр, күзәтәләр һәм кайвакыт син үзең күрмәгән көчле якларыңны күреп алалар.

Аерым бер мәсьәлә – мотив. Һөнәрне тик акча өчен генә сайласаң, озакка җитмәскә мөмкин: кызыксыну булмаса, тырышып та эшләп булмый. Әмма кызыксыну белән бергә кирәкле белем һәм тәҗрибә дә кирәк. Шул ук вакытта, бүгенге көндә популяр булган һөнәр иртәгә кирәксез булып да кире чыга ала - шуңа күрә үзгәрүләргә әзер булу да мөһим.

Нәтиҗәдә, үз сәләтеңне ачыклау –  адымлап барган юл. Кызыксыну, практика, киңәш һәм анализ бергәләп дөрес карарга ярдәм итә. Һәм иң мөһиме – беренче адымны куярга курыкмау: эшләп карау , сорашу - барысы да үзеңне табарга ярдәм итәчәк.

Подпишитесь на Telegram- канал газеты «Маяк», а так же читайте нас в «Дзен» и всегда оставайтесь в курсе новостей района!