Бүген Азнакайда 100 нче пар теркәлде

Туй мизгелләре һәрчак күңелле инде ул. Ә менә йөзенче пар булып теркәлү - икеләтә шатлыклы һәм тантаналы. Бүген Азнакайда йөзенче пар кушылды. Игорь Кравченко белән Айгөл Сабирова өчен гомергә истә кала торган көн булды. Айгөл - Азнакай кызы, ә менә Игорь - Алтай якларыннан. Алар Ноябрск шәһәрендә ашыгыч медицина ярдәме станциясендә эшләгәндә танышалар. Ерак араларны якын итеп, туйны җәйге ял чорында кызның туган шәһәрендә үткәрергә карар кылалар. Игорьга Азнакай үзенең чисталыгы, гөл-чәчәкләр эчендә утыруы һәм халкының кунакчыллыгы белән ошаган.