Беркатлы халык һаман ышана һәм алдана бирә

Соңгы вакытта ялганлау юлы белән акча үзләштерүчеләрнең саны бермә-бер артты. Мошенниклар үз максатларына ирешү өчен нинди генә ысуллар кулланмый. Бозым чыгару, кыйммәтле бүләк откан өчен акча күчерү, сыйфатсыз товар тарату, социаль хезмәткәр, табиб сыйфатында йортка үтеп керү һәм алар киткәч өй эчендәге кайбер кыйммәтле әйберләрнең югалуы - боларның барысы да халык ышанычын яулап эшләнә. Хокук саклау органнарының халыкны бертуктамый кисәтеп торуларына да карамастан, мондый гамәлләр кабатлана тора, беркатлы халык һаман ышана һәм алдана бирә. Ел башыннан республикада 39 социаль мошенниклык факты теркәлгән. Бәхеткә, районда кырыгалдарлардан каза күрүчеләр юк. Шулай да һәркемнән саклык чаралары күрү сорала, төрле кешенең тәмле теленә ышанмагыз, акчаларыгызны таныш булмаган кешегә биреп, алданмагыз.