Азнакайлылар, игелекле булуыгыз өчен рәхмәт белдерәбез

Синең ярдәмгә мохтаҗ булган берәрсенә чак кына булышлык күрсәтә алсаң да җаннар җылынып, күңелгә рәхәт булып китә. 1 июнь - Балаларны Халыкара яклау көнендә Татарстан мәйданында үткән шәфкатьлелек концертында акча туплауда үз өлешен кертеп, райондашлар да шундый халәт кичергәндер. Бу чарада җыелган 102 мең сумнан артык акча районыбызда яшәүче өч яшьлек сабый Ислам Мостафинны каты авырудан дәвалау өчен тапшырылды. Шушы игелек чарасында катнашкан олы җанлы азнакайлыларга, хезмәт коллективларына, оешма-предприятиеләр җитәкчеләренә үз изгелекләре үзләренә кайтсын һәм ураза аенда бары тик уңышларга гына ирешеп, яхшы хәбәрләр генә ишетеп яшәргә язсын, дип теләргә генә кала.