Азнакайлылар бәрәңге сабагы яккан өчен штрафка тартылачак

Көз көне шәхси участок, йорт ишегалларыннан куе төтен күтәрелә. Хуҗалар әнә шулай кышка керер алдыннан үз биләмәләрен тәртипкә китерәләр: бәрәңге сабаклары, чүп-чар, агач, куак ботакларын ягалар. Бу хәл тирә-як мохитне пычрата, кешеләр сәламәтлегенә нык зыян сала. "Чистарыну" еш кына янгыннарга да китерә. Нәкъ менә шушы чорда шәхси хуҗалыклардан чыккан янгыннарның саны бермә-бер арта. Шуңа күрә дә битараф булмаска, бәрәңге сабагы ягып яткан күршеләрне дә кисәтергә кирәк.

Һәрвакытта да исегездә тотыгыз: учакны төзелешләрдән 50 метр читтә генә ягарга рөхсәт ителә. Аны бер генә минутка да күзәтүчесез калдырмаска, соңыннан су, я ком белән сүндерергә кирәк. Шәхси участокларда сулы мичкәләр, ут сүндергечләр булырга тиеш.

Бу көннәрдә " Торак - 2015" операциясе кысаларында профилактик операцияләр оештырыла. Янгын кагыйдәләрен тупас бозучылар административ җаваплылыкка тартыла. Закончалыкларны сакламаучылар янгын куркынычсызлыгы хезмәткәрләре тарафыннан штрафка тартылырга мөмкиннәр. Ул гражданнарга - 1000нән 1500гә кадәр; җаваплы кешеләргә - 6000-15000; юридик затларга - 150000 - 200000сум күләмендә.

Равил ХӨСӘЕНОВ,

күзәтчелек эшчәнлеге бүлеге баш белгече