Азнакайда яшәүче Наҗия апа Әхмәтшина 90 яшен билгеләп үтте

Азнакай шәһәр комитеты җитәкчесе Расих Шәкүров шәһәребездә гомер итүче Наҗия апа Әхмәтшинаны 90 яшьлек юбилее белән котлады. Аны матур бәйрәме белән котларга үзе эшләп чыккан "Азнакайнефть" идарәсенең ветераннар советы рәисе Мисбах Мәсәлимов, социаль яклау идарәсе вәкилләре дә килгән иде. Әлбәттә, Наҗия апаның балалары, оныклары да җыелган.

Гомерен хезмәттә үткәргән Наҗия апа ире - сугыш ветераны Миргазиян Вәлиуллин белән 4 бала үстергәннәр. Кызганыч, Миргазиян ага инде вафат.

-Тату, матур яшәдек, - ди 65 ел бергә гомер итү серләрен чишеп тыл ветераны. - Эштән курыкмадык, табыннарыбыз да һәрчак мул булды. Аллага шөкер, тормышымнан канәгатьмен. Балаларым, оныкларым да исән-сау, бәхетле булсыннар!