Азнакайда янгын чыгуны махсус приборлар кисәтеп тора

Ул теләсә кайсы вакытта, теләсә кайда килеп керергә мөмкин. Шуңа күрә дә алдан ук куркынычсызлык чараларын күрергә кирәк. Мәгълүм булганча, янгыннар күпчелек кеше йоклаган вакытта чыга. Чөнки бу чорда төтен, газ исен дә сизмибез. Менә монда безгә янгын чыганагы турында хәбәр бирүче махсус прибор ярдәмгә килә дә инде.

Азнакай ирекле янгын сагы бүлеге һәм янгын күзәтчелеге хезмәткәрләре авыр тормышлы күпбалалы гаиләләр яшәгән йортларга әнә шундый приборлар куеп чыкты. Мондый җайланмалар 9 йортка һәм аның һәрбер бүлмәсенә урнаштырылды. ВДПО инструкторы Р. Зәкиева бер үк вакытта янгынга каршы инструктаж уздырып, ут куркынычсызлыгы турында белешмәләр дә таратты.

Алдан коралланып куйсак, безгә "кызыл әтәч" тә куркыныч түгел.

Янгын күзәтчелеге матбугат хезмәте