Азнакайда лицейчылар балы узды

Өченче ел рәттән шәһәребездә лицейчылар балы уза. Традиция буенча быел да ул укуда, сәнгатьтә, спортта югары уңышларга ирешкән укучыларны җыйды.

Физика-математика юнәлешендә белем бирүче 4 нче лицейның бай тарихы һәм горурланырлык уңышлары бар. Биредә «Өстенлекле мәктәп» проекты тормышка ашырыла. Ул бик күп сәләтле балаларны олы тормыш юлына очырган.

Район башкарма комитеты җитәкчесенең икътисади мәсьәләләр буенча урынбасары Гөлия Сөләймәнова хакимият исеменнән укучыларны шундый күркәм бәйрәм белән тәбрикләде һәм алга таба да тырышып укуларын, яңа үрләр яулауларын теләде, моның өчен мәктәптә барлык мөмкинлекләр булуын белдерде.

Иң яхшы өч укучыга: Нәзилә Рахманова, Булат Гаптуллин, Илназ Нуриевка лицей директоры Ленар Хәбибуллин грантлар һәм "Броско" фирмасыннан мәктәп формасы алуга 2000 сумлык сертификат тапшырды.

Бал исә анда катнашучыларны сихри әкият дөньясына алып керде. Көяз кавалерлар, купшы күлмәкле кызлар, аларның нәфис биюләре күзләргә генә түгел, җаннарга да матурлык өстәде.

Резеда ШӘРИПОВА