Азнакайда бер әни эчкечелектән дәваланырга ризалыгын бирде, башкалары бүтән эчмәскә ант итте

Их, шул хәмер сазлыгын! Нинди асыл ир-егетләрне, чәчәк кебек хатын-кызларны үзенә сурып ала! Кул сузучы булганда, чыгарга иде дә шул баткаклыктан, юк бит, "мин сәрхүш түгел" дип, дәвалануга аяк терәп каршы торучылар бар.

- Дуслар килгән иде.

- Туган көн иде.

- Талаштык та, шуңа эчтем.

- Бер-ике рюмкадан нәрсә була?

- Сыра гына бит ул!

Алар әнә шулай акланалар. Хәмер белән кайгыны да, шатлыкны да юуны гадәти хәлгә саныйлар. Әйе, кемдер бер-ике рюмка белән туктап кала ала. Ә кемдер өчен бу гомерлек чиргә әверелә. Закон буенча исә бала янында гомумән дә спиртлы эчемлекләр куллану тыела, чөнки эчкән кеше үзен-үзе белештерми. Азмы фаҗигале очраклар!

Азнакайда балигъ булмаганнар эше һәм аларның хокукларын яклау комиссиясе утырышында тикшерелгән 16 эшнең 7се - бала алдында хәмер кулланган әти-әниләрнеке иде. Гаиләдә ир эчсә - ярты балә, хатын эчсә - дөнья таркала. Елдан-ел эчкече аналарның саны арта, шунысы нык борчу тудыра. Бу юлысы бер әни дәваланырга ризалыгын бирде. Башкалары башка эчмәскә ант итте. Ышанасы килә.

Резеда СӘРВӘРОВА