Азнакай янгынчылары нефь объектларында чыккан янгынны сүндерү буенча өйрәнүләрдә катнашты

Зәп-зәңгәр күк йөзе кара төтен белән капланды. Берникадәр вакыттан зәһәр ялкын телләре дә күренде. Сирена тавышлары ишетелде. Янгын сүндерүче машина килеп туктады. Аның эченнән ялкын сүндерүчеләр чыгып, утны тиз генә юк итәр өчен, су агымы җибәрделәр...

Юк-юк, курыкмагыз, сүз Азнакай районында килеп чыккан берәр янгын турында түгел. Бу 18 нче июль көнне янгын сүндерүчеләрнең өйрәнүләре үтте.

Бу чара 3-5 елга бер генә үткәрелә. Махсус полигонда янгын сүндерүчеләргә мастер класс күрсәтелде дисәң дә була. Иң элек барысын да янгын белән көрәшүче машина төрләре, аларның функцияләре белән таныштырдылар.

Теория өлешеннән соң аларның практикада эшен үз күзләребез белән күрә алдык. Нефть цистернасында үлән, резина һәм башка өслекләрдә биешкән ялкын телләре тиз арада юк ителде.

Зилия Хәбибуллина