Азнакай укучылары – Кырлайда

Тукайның 130 еллык юбилее уңаеннан районда күптөрле чаралар оештырылды. Алар җирлегебез кысаларына гына сыймый, республикакүләм төс алды. "Бердәм Россия" сәяси партиясенең Азнакай территориаль бүлеге сәяси советында аның секретаре Марсель Шәйдуллин тарафыннан мәктәп укучылары арасында бөек әдипнең иҗатына багышлап инша бәйгесе уздыру турында карар кабул ителде. Бәйгедә 5-11 сыйныф укучылары - кырыктан артык бала катнашты. Бәйгедә катнашучыларга зур сюрпиз ясап, Татарстан Дәүләт Советы депутаты Рөстәм Мөхәммәдиев һәм район башлыгы Марсель Шәйдуллин аларга Тукайның туган авылы Кырлайга сәяхәт оештырдылар. Балаларның сөенече чиктән ашкан иде. Алар авылдагы Тукай музеенда, Сәгъди агай йортында булдылар. Сәяхәттән алган бу тәэсирләр әле озак онытылмыйча, хәтерләрдә яңарып торыр.