Азнакай район башлыгы Марсель Шәйдуллин Җиңү бәйрәме белән котлый!

Быел без Бөек Ватан сугышында  Җиңүнең 74 еллыгын билгеләп үтеп, тарихи истәлекле вакыйга – юбилей елына аяк басабыз. Еллар ничек кенә тиз узмасын, Җиңү көне елаткан да, җырлаткан да бәйрәм булып күңелләребездә мәңге яши һәм яшәячәк. Без бүген яу кырында һәлак булган, үз-үзләрен аямый көрәшеп шәһит киткән райондашларыбызның якты истәлеген олы хөрмәт белән хәтерләрдә яңартабыз, аларның рухлары алдында баш иябез. Фронттагыларның аяусыз батырлыгы, тылдагыларның тиңдәшсез фидакарьлеге тарих битләре аша буыннарданбуыннарга күчеп, кадерләп саклана. Сугыш чоры буыны алдында  без зур бурычлы. Илгә Җиңү яулаган ветераннарыбызның сафлары, кызганычка каршы, елдан-ел сирәгәя бара. Аларга назхөрмәтебезне мөмкин кадәр күбрәк бирергә тырышыйк, исән чакта кадерләрен белеп калыйк!  Ир-егетләр фронтта чакта тормышның бар авырлыгын үз җилкәләренә алып тылда тырыш хезмәт куйган апаларыбызга тирән рәхмәтләребезне җиткерәбез. Ятимлек ачысын, бу чор авырлыгын кичереп үскән сугыш чоры балаларына ихлас йөрәктән чыккан изге теләкләребезне ирештерәбез. Илгә Җиңү яулаган хөрмәтле ветераннарыбыз, тылда армый-талмый хезмәт куйган апаларыбыз, тормышның бар михнәтен татыган сугыш чоры балалары, барча азнакайлылар! Җиңү бәйрәме белән тәбрик итеп, сезгә исәнлек-саулык, гаилә бәхете, бары тик шатлык-куанычлар гына кичереп яшәвегезне телим! Күгебез аяз, ил-көннәребез имин, бәрәкәтле булсын! Бәйрәм белән!

Марсель ШӘЙДУЛЛИН,

Азнакай муниципаль районы башлыгы