Югары Стәрле авылы балалары Яңа ел тарихы белән таныштылар

Яңа ел - иң якты, кабатланмас, тылсымлы һәм сихри бәйрәм. Аны аеруча балалар көтеп ала. Алар өчен Яңа ел, беренче чиратта, могҗиза, Кыш Бабай һәм Кар Кызы, бүләкләр белән бәйле. Моннан тыш, балалар бәйрәм турында кызыклы хикәяләр, истәлекләр дә тыңларга яраталар. Югары Стәрле авылы китапханәсендә узган "Кышкы әкият" дип исемләнгән әдәби бәйрәмдә балалар Яңа ел белән бәйле тарихи вакыйгалар белән дә таныштылар. 

- Балалар Россиядә Яңа елны бәйрәм итү, чыршы бизәү һәм Яңа ел төнендә Кыш бабайдан бүләкләр алу традициясе барлыкка килүе турында белделәр. Ике командага бүленеп, тематик биремнәрне үтәделәр: блиц-турнир сорауларына җавап бирделәр, табышмаклар чиштеләр, җитезлек һәм тапкырлыкта ярыштылар, - ди Югары Стәрле авылы китапханәчесе Нәзирә Латифуллина.

Җылы, эчтәлекле, ачышларга һәм төрле истәлекләргә бай булган әлеге чара балалар күңелендә онытылмаслык тәэсирләр калдырды.