Район башлыгы Марсель Шәйдуллин азнакайлыларны  Яз һәм хезмәт бәйрәме белән котлады

Якынлашып килүче 1 Май – Яз һәм Хезмәт бәйрәме белән иң җылы котлауларымны кабул итеп алыгыз!

Беренче май – ул язгы яңарыш һәм фидакарь хезмәтебезгә лаеклы хөрмәт-ихтирам бәйрәме.  Ул төрле буын вәкилләренең күңеленә якын, аны олысы да, кечесе дә яратып көтеп ала. Ветераннар өчен ул яшьлекләре, яшь чактагы хезмәт казанышлары турында хатирәләр булса, яшьләр өчен – тормышта дөрес юлны сайлау, яңа идеяләр һәм кыю карарлар табу мөмкинлеге.

Хезмәт сөючәнлек, игелеклелек, үзара ярдәмчел булу – районның һәр кешесенә хас сыйфатлар.  Бүген һәр тармакта барган уңай үзгәрешләргә районыбыз халкының һәркайсы үзеннән зур өлеш кертә. Уртак тырышлык белән киләчәктә дә районыбыз чәчәк атар, һөнәрле, тырыш халкыбыз мул тормышта яшәр дип өметләнәм.

Кадерле райондашлар! Бу якты бәйрәм көнендә һәрбарчагызга иминлек, бәхет-сәгадәт, тотрыклылык, тынычлык һәм иң якты өмет-хыялларыгызның тормышка ашуын телим! Яз һәм Хезмәт бәйрәме белән! 1 Май белән!

Марсель Шәйдуллин, Азнакай муниципаль район башлыгы