Азнакай район башлыгы Марсель Шәйдуллин Матбугат көне белән котлады

Сезне барыгызны да Татарстан Республикасы Матбугат көне белән ихлас котлыйм!

Бүгенге заман кешесенең тормышы интернет, электрон мәгълүмат чараларына нык бәйле булуга карамастан, яшәешне басма газета-журналлардан башка күз алдына китерү мөмкин түгел. Эшләү рәвеше ничек кенә алмашынмасын, сез халыкны мәгълүматлы итү, аның рухи байлыгын арттыру, һәр яңалыкның асылына төшенергә ярдәм итү өчен иң кадерле хәзинә – сүз байлыгын кулланып, укучыларыгызның күңеленә үтеп керәсез. Хәбәрчеләр, газета укучылар белән җылы мөнәсәбәтегез, көн кадагына суга торган кирәкле һәм кызыклы язмаларыгыз “Маяк”ның абруен югары саклый. Район журналистларының каләм көче киләчәктә дә кимемәс, журналистика үсешенә, район халкының милли матбугатын һәм мәдәниятен, социаль-икътисадый тормышын үстерүгә үз өлешен кертер, район газетасы алга таба да үз укучыларын югалтмас, һәр өйдә көтеп алынган кунак, сердәшче, фикердәшче булыр дип ышанам.

Һөнәри бәйрәмегез белән ихлас күңелдән котлап, барыгызга да ныклы сәламәтлек, гаилә бәхете, имин көннәр, күтәренке рух телим.

Марсель Шәйдуллин, Азнакай муниципаль район башлыгы