Гөлчәчәк Садретдинова илһамлана-илһамлана кышка банкалар яба

***

Тиен кебек бөтереләм,
Турыйм, пешерәм, ябам.
Бу "нәфеснең" һич кенә дә
Туясы юктыр һаман!

Банка арты банка белән
Тулып тора киштәләр.
Гаскәр кебек тезелешеп,
Алар базга төшәләр!

Кайнатма, салатларның да
Төрләре артып тора.
Өйдәгеләр дә канәгать-
Йөзләре балкып тора!

Бераз мактап җибәрсәләр,
Мин дә үсенеп китәм,
Ясарга икән, ясарга,
Ярар, беткән баш-беткән!

Кунак килсә дә сый әзер,
Үзең дә "җилгәрәсең"!
Өстәвенә күчтәнәчкә
Биреп тә җибәрәсең!

Артмас әле булганы дим,
Алда-озын кышларда.
Шуңа күрә вакытымны
Уздырмыймын бушларга!

Гөлчәчәк Садретдинова