Азнакай шагыйрәсе Алинә Хисамиевадан шигъри күчтәнәч

        Аклык 
Ап-ак карлар ява бүген җиргә, 
Яңа елның яңа саф кары 
Ишеп яуган аклык - җиһан өсте 
Бар тылсымы бераз, бар зары. 
 
Юып төшергәндәй гаделсезлек, 
Пакъ аклыкка чумган дөньялар 
Өем-өем аклык- шатлык ара, 
Бер пәрдә һәм ялгыз пыяла. 
 
Ак шәлләрен бәйләп акъәбиләр 
Салмак кына атлый урамнан 
Ә йөзләре әллә карлар кунып, 
Әллә хәтер барлап чыланган. 
 
Бу аклыктан хәят моңга тулган 
Нур бөркелә үткән күзләрдән. 
Карлы йомгакларга чак кушылып 
Дуслык, сөю иңә күкләрдән. 
 
Ил тормышын уйлап, ир-егетләр 
Ак карлардан тезәр күпме уй. 
Шашып сөйгән йөрәкләрне җигеп 
Бу аклыктан үтәр күпме туй... 
 
Җитез генә атлап барган җирдән 
Ябешкәндәй булдым тәр(ә)зәгә 
Әллә нигә китек иде күңел, 
Аклык җитмәү икән галәмгә.