Азнакайлылар, суган кабыгын ташларга ашыкмагыз!

Үсемлекләр кара черек авыруына бирешмәсен өчен суган төнәтмәсе ярдәм итә. Суган кабыгына бер литр су салып, бер тәүлек төнәтегез. Сөзеп, һәр 6 көн саен 2-3 тапкыр әлеге суны сибегез. Төнәтмә туфрактагы зарарлы микрофлораны үтерә, аны микроэлементларга баета.

Шулай ук гөблә, пәрәвез бете кебек корткычларга каршы да суган кабыгының файдасы зур. Бер чиләк коры суган кабыгына 2-3 л җылы су салып, 3-5 тәүлек төнәтергә кирәк. Тиешле вакыт үткәч, төнәтмәне сөзеп, кер сабыны кушыгыз (1 л суга 2 гр сабын исәбеннән). Сибәр алдыннан төнәтмәгә 1:2 нисбәтендә су өстәргә кирәк. Өч литр суган төнәтмәсе унышар литр агулы химикатны алыштыра, дип яза «Акчарлак» газетасы.

Парник эченә суган кабыгы кайнатылган су (кабыгы да шунда калырга тиеш) куегыз. Вакыт-вакыт әрем себеркесе белән яшелчәләргә суган душы кертегез.