Азнакай хуҗабикәләренең файдалы киңәшләр сандыгына

Без дә сезгә берничә киңәш тәкъдим итәбез. Бәлки кайберләреннән файдаланырсыз да.

• Пешергәндә дөге ап-ак һәм таралып булсын өчен аны пешергән суга 1 аш кашыгы серкә салыгыз (кислотасын түгел). Әгәр кәстрүлегез кечкенә булса (бер кешегә генә әзерләгәндә) әзрәк салыгыз.
• Соусны каймак белән ясаганда каймакка сөт кушыгыз, шулай иткәндә ул оемый.
• Кыздырганда кәбестә көрән төскә кермәсен өчен, аны вак итеп турагыз, өстенә кайнар су коегыз. Аннан  кәбестәгә салкын су өстәгез. Бер минутта сыгып алыгыз һәм табага салыгыз.
• Чын кәһвә яратучылар аңа әз генә тоз салганда исе хуш булын беләләр.
• Сез соус ясыйсыз, ә рецептта күрсәтелгән ак шәраб юк. Кибеткә чабаргамы? Башка ысул сайларга була. Әз генә серкәдә ике шакмак шикәрне эретегез һә аны ак шәраб урынына кулланыгыз.
• Хуҗабикәләр озак вакыт ачык торган томат пастасының өстендә күгәрек барлыкка килүен беләләр. Алай булмасын өчен аның капкачына коры гәрчич сөртергә кирәк.
• Чөгендер тизрәк пешсен өчен аны бер сәгать пешерәбез, аннан 10 минутка салкын суга салабыз. Менә шул гына.  Чөгендер пешерү вакыты өч урынына бер сәгать кенә була.
• Майонезны өйдә дә – буягычларсыз һәм химиясез ясарга була. Каймакка бер чәй кашыгы гәрчич һәм уылган пешкән йомырка  сарысы кушабыз.

Киңәшләребез файдалы булсын!