Азнакайдан яшь баянчы Әмин Шакиров Мәскәү тамашачысын яуларга бара

Әмин Шакиров беренче карашка гадәти малай кебек: дуслары белән шаярырга, спорт белән шөгыльләнергә ярата, тырышып укый. Әмма аңа зур сәләт бирелгән - ул баянда, хромка һәм тальян гармуннарда оста уйный. Халык уен коралларына мәхәббәт бабасыннан һәм әбисеннән күчкән.

Елдан-ел Әминнең осталыгы арта гына. Балалар сәнгать мәктәбе укытучысы Илгизә Шакирҗанова кулы астында шөгыльләнеп, ул зур уңышларга да ирешкән инде. Сигез яшендә "КамАЗ" дусларын җыя" халыкара конкурсында һәм "Мәскәү-транзит Бөгелмә" Бөтенроссия фестиваль-конкурсында беренче дәрәҗә лауреат була. Башка бәйгеләрдә дә актив катнашып, призлы урыннар яулый.

Хәзер ул укытучысы белән Мәскәүдә узачак конкурска әзерләнә. Уңышлар юлдаш булсын сиңа, Әмин!