Азнакай районы Чубар Абдул авыл җирлегенә караган Мәндәй авылында сайлауда яңа өйләнешкән Гыйздәтуллиннар гаиләсе тавыш бирде

Тормышларының шундый тантаналы көнендә аларның сайлауга килүе үзе үк яшьләрнең  сайлауларга җитди карашы, алдагы тормышларына битараф булмавы  турында сөйли.

- Россия  Федерациясе Президентын сайлау – ул һәммәбезнең  гражданлык бурычы. Сайлауларга килергә кирәк, чөнки без үзебезнең киләчәгебез өчен тавыш бирәбез, – ди гаилә башлыгы Рәмис Рәсим улы.

Рәмис  һәм Илүзә икесе дә шушы авыл яшьләре. Үзләре әйткәнчә шушы  гүзәл авылда туып үскәннәр, кечкенәдән үк килгән танышлык тора-бара  мәхәббәткә әйләнгән һәм матур гаилә корганнар.

- Бер авылдан булгач, бер-беребезне, әти-әниләребезне  бик яхшы беләбез. Икебез дә Әлмәт шәһәрендә белем алып, мин – медицина хезмәткәре, иптәшем нефтьче булып эшлибез. Туган якларыбыздан беркая да китмәдек, чөнки Азнакаебыз безгә бик якын һәм ошый. Әти-әниләребездән дә ерак китәсе килми. Нинди рәхәт бит ул әти-әниең яныңда булса.   Алга таба да ике якның да әти-әнисен тигез күреп, бергә-бергә матур итеп яшәрбез дип ышанам, – ди   Илүзә Закир кызы

 Гыйздәтуллиннар кебек туган якларыбызның патриоты булган,  аны яраткан  яшьләребез күбрәк булсын иде ул.