Гаилә белән ярыштылар

Спортчы гаиләләрне сәламләп, «Юбилейный» спорт мәктәбе директоры Айрат Миңнегалиев аларга рәхмәт белдереп, уңышлар теләде.
– Спорт гаиләне тагын да татулаштыра, берләштерә, бүгенге ярышлар да барчагызга да яхшы кәеф бүләк итсен, – диде Айрат Ясир улы.
Эстафета ярышларында һәр гаиләдән әти яки әни һәм бала катнашты. Алар 1, 2, 3 һәм 5 чакрым арага узыштылар. Шунда ук спортчылар өчен ГТО нормативларын тапшыру мөмкинлеге дә булды.
Гөлназ Наушиева ярышларга улы Данияр белән килгән. Ике уллары – Данияр белән Динар икесе дә чаңгы гына түгел, башка спорт төрләре белән дә дуслар.
– Гаиләбез белән сәламәт яшәү рәвешен пропагандаларга тырышабыз. Кыш көннәрендә шулай барыбыз бергә чаңгы шуарга яратабыз, бассейнга йөрибез. Спортны үз иткән кеше сәламәт була, ә сәламәтлек барлык башлангычларның нигезе ул, – ди Гөлназ ханым.
Нәтиҗәләр буенча Лилия һәм Ясминә Шакировалар беренче урынга лаек булды. Тагын бер Шакировлар гаиләсе – әнисе Резеда белән стартка баскан улы Әмирхан икенче килде.. Ксения һәм Сергей Тазовлар өченче урынны яуладылар.