Азнакайда көзге ярминкәләр башланды

Ярминкә әле беренче генә уздырылса да, халыкка тәкъдим ителгән товарларның күплеге сөендерә: теләгән бере үзебездә җитештерелгән итен дә, сөтен-маен, кәбестә-кишерен, балын да сатып ала алды. 

Ярминкәнең башлану вакыты 9.00 сәгатьтә дип билгеләнсә дә, шәһәрнең «Шифа» үзәге каршындагы мәйданда иртән-иртүк кызу алыш-биреш башланган иде.

- Бүгенге ярминкә әле соңгысы булмаячак, ел саен шулай ярминкәләрдә катнашып, шәһәрдәшләрне сыйфатлы азык-төлек белән тәэмин иткән авыл уңганнарына зур рәхмәт, — диде район башлыгы Марсель Шәйдуллин азнакайлыларны сәламләп. 

Карамалы авылында яшәүче Хәлимовлар гаиләсе ярминкәгә күпләп тавык, үрдәк ите алып килгән.

- Үрдәкне ел саен 200 баш үстерәбез. Үрдәк бибиләрен күпчелек үзебез чыгарабыз яки бер тәүлек зурлыктагыларын алып үстерәбез, - ди Зөлфия ханым.

Ярминкәдә бал продукциясе дә мулдан булды. Сәгадәт Гомәров – 8нче буын умартачы икән.

- Әти умартачы булып эшләде, кечкенәдән аның кул арасына кереп, әлеге эшнең нечкәлекләрен белеп үстек. Олы яшьтә булсак та, кортлардан аерыласы бер дә килми, - ди ул. 

Беренче көзге ярминкәдә авыл клублары, китапханә коллективлары да актив катнашты.

- Үзебез үстергән, әзерләгән сый-нигъмәтләрне алып килдек. Иртән- иртүк чират торып алдылар, - ди Сәпәй авылы мәдәният йорты сәнгать җитәкчесе Ләйсән Латыйпова. 

Сәпәйдә яшәүче Гәрәйшиннар халыкка мулдан кәбестәсен, помидор-кыярын тәкъдим итте. Фәридә апа үстергән чәчәк үсентеләре дә күпләрне кызыксындырды.

- Чәчәкләр – минем стихиям, аларны кечкенәдән яратсам да, эшләгән чорда күпләп үстерү, үрчетү мөмкинлеге булмады. Лаелы ялда булгач, рәхәтләнәм менә. Бөтен бакчабыз шау чәчәктә утыра, хризантемаларны аеруча яратам, - ди авыл уңганы. 

Ярминкәдә эре терлек итенә ихтыяҗ аеруча зур булды. Машиналар кырындагы озын-озын чиратлар да әнә шул хакта сөйли. Авылдагылар шәһәр халкына итне килограммын 450-480 сумнан тәкъдим итте.

Ярминкәгә килүчеләр үзешчәннәребез әзерләгән концерт номерларын да яратып карады.

Ярминкә бәяләре

• Эре терлек ите – 450-480 сум
• Ит фаршы – 490 сум
• Тавык– килограммы 320 сум
• Үрдәк – килосы 650 сум
• Йомырка – 70 сум
• Кәбестә – 25-35 сум
• Кишер – 35 сум
• Кызыл чөгендер – 25 сум
• Сарымсак – 250-350 сум
• Бәрәңге – килосы 35 сумнан башлана