Азнакайлы мошенникларга 2,2 миллион сум акча күчергән

52 яшьлек актүбәле мошенниклар кулына килеп кергәнен аңламый да кала. Үзен Үзәк Банк вәкиле дип таныштырган ир-ат аның исеменә билгесез затларның 1 миллион 500 мең сумга кредит  алулары турында әйтә. Үзара аралашу барышында банкта акчасы барлыгын белгәч, әлеге ханымга мошенниклар биш куллап ябышалар. Хәтта артыннан машина да җибәрәләр. Каза күрүче банкка барып, 700 мең сум акчасын ала да, Бөгелмә шәһәренә аферистлар әйткән банкка юл тота. Анда инде аның исеменә 1,5 миллион сум кредит алып куелган була. Барлыгы 2 миллион 200 мең сум акчаны ул аферистлар әйткән счетка үз куллары белән күчерә.