“Татар-информ” - .tatar доменында эшләүче беренче яңалыклар сайты

Ишетми калма!

30 августта, Республика көнендә, Татарстанда .tatar доменында татар телендә беренче яңалыклар сайты эшли башлады. "Татар-информ" мәгълүмат агентлыгының татар редакциясенең яңа адресы - http://tatar-inform.tatar.

"Татар-информ" мәгълүмат агентлыгының татар редакциясе бүгенге көндә халыкка Татарстан, Россия, һәм башка илләр тормышын чагылдырган 60 тан артык яңалык җиткереп бара.

tatar-inform.tatar сайтының социаль челтәрләрдә - Facebook, VK, Instagram, Twitter, OK да үз төркемнәре бар. Киләчәктә "Татар-информ" яңалыкларына Telegram, WhatsApp мессенджерларында да язылып булачак. Сайтның мобиль версиясе дә эшли.

"Татар-информ" мәгълүмат агентлыгының татар редакциясендә үзгәрешләр агымдагы елның июнь аенда башланган иде. Соңгы өч ай эчендә редакция тарафыннан тәкъдим ителгән яңалыклар - 30 процентка, сайтка керүчеләр саны алты тапкырга артты.

Бүген сайтта "Татар дөньясы", "Мәдәният", "Рәсми хәбәрләр", "Авыл", "Икътисад", "Хәвеф-хәтәр", "Фән һәм мәгариф", "Спорт", "Дин" рубрикалары алып барыла.
"Аналитика, күзәтү" бүлегендә аналитик язмалар, "Әңгәмә" рубрикасында төрле темаларга әңгәмәләр, "Татар матбугаты" бүлегендә бүгенге татар газета-журналларында чыккан актуаль язмалар тәкъдим ителә.

Редакциянең тагын бер эш юнәлеше - ул татар җәмәгатьчелеген борчыган проблемаларга багышланган матбугат конференцияләре уздыру. Алар татар телендә алып барылачак.

Сүз уңаеннан, "Татар-информ" мәгълүмат агентлыгы 1990 елның 6 июненнән эшли.

.tatar домены татар телле сайтларны үстерү, Татарстан Республикасын дөньяда таныту, татар сайтларына аудиторияне җәлеп итү максаты белән 2013 елда булдырылган иде.